Іс-шара аясында Қазақстан мен Орталық Азиядағы креативті индустрияларды қолдауға және дамытуға бағытталған Yandex Creative Lab бастамасы таныстырылды. Акселерациялық апта форматы кино мен сериалдарды жасаумен айналысатын сарапшылар өткізетін шеберлік сабақтары, практикалық сессиялар және ашық пікірталастар айналасында құрылған, деп хабарлайды Social Media.
Yandex Creative Lab – бұл шығармашылыққа қызығушылығы бар, талантты, саладағы ісін жаңа бастап жатқан адамдарға бағытталған бастама. Осы бастаманы құра отырып, Yandex Qazaqstan жүйелі оқуға, тәжірибе жасауға және өсуге мүмкіндік беретін кеңістік пен жағдай жасауды мақсат етеді. Сонымен қатар жаңа буын кәсіби мамандарды өсіріп, болашақ кадрларға индустрияға енуге және компанияның түсірілім жобаларының бір бөлігі болуға көмектеседі.
18-20 маусым аралығында Петропавлда Yandex Qazaqstan-ның Акселерациялық аптасы өтуде – бұл креативті индустриядағы жас мамандарға арналған білім беру және практикалық бағдарлама. Қазақстанның түрлі өңірлерінен келген 60-тан астам қатысушы – режиссерлер, суретшілер, медиаменеджерлер мен сценаристер Qyzylzhar Creative Center орталығында жиналып, білім алуға, жаңа нәрселерді байқап көруге және кәсіби байланыстар орнатуға кірісті.
Қатысушылар мен сарапшылар қазақстандық кинематографияда сценарий қалай жұмыс істейтінін, креативті жобаға команданы қалай жинау керектігін, идеяны қалай визуализациялап, оны көрермен мен продюсерге қалай ұсыну қажеттігін, сондай-ақ медиада қалай көрініп, ақпарат тасқынында жоғалып кетпеуді талқылады.
«Бүгін айтылған жергілікті мамандарды қолдау туралы ой — шынымен де маңызды. Бұл аймақ тұрғындарының талабы еленіп, үні жоғары деңгейде естілуі мүмкін деген белгі іспетті», – деп өз әсерімен қатысушылардың бірі бөлісті.
Менторлар мен спикерлер ретінде сала мамандары сөз сөйледі:
– Әмір Қарақұлов – режиссер, қазақстандық жаңа толқын өкілі,
– Баян Барманқұлова – өнертанушы, қазақ бейнелеу өнерін зерттеуші,
– Елена Бродская – Кинопоиск халықаралық жобаларына жауапты, Disney-дің Ресей мен ТМД бойынша бұрынғы маркетинг жөніндегі вице-президенті,
– Александр Аксютиц – медиапродюсер, Salem Social Media негізін қалаушы,
– Виктория Беляева – сценарист және кино мектебінің оқытушысы,
– Данияр Бахтияров – қоюшы-оператор.
Олардың әрқайсысы тек өз тәжірибесімен бөлісіп қана қоймай, күрделі тақырыптарды да талқылады: қорқыныштар, сенімсіздік, жергілікті контекстің сын-қатерлері.
«Көрерменді түсінбей жасалған креатив – қараңғыда оқ атқанмен тең. Бүгінде сценаристке, режиссерге немесе продюсерге өз ойын жеткізуді ғана емес, оны кімге жеткізгісі келетінін де ойлау маңызды. Аудиторияны саналы түрде ескеру – шығармашылықты шектемейді, керісінше оны күшейтеді – оқиғаны көрерменге жақын, дәл және маңызды етеді», – деді Кинопоиск халықаралық жобаларының жетекшісі Елена Бродская.
Ұйымдастырушылар бұл оқиғаның бір реттік шара емес, жүйелі бастаманың бір бөлігі екенін атап өтті. Акселерациялық аптаға қатысушылар менторлармен онлайн жұмысын жалғастыру мүмкіндігіне ие болып, Yandex Creative Lab-тың басқа да білім беру және практикалық форматтарына қатысуға үміткер бола алады.
«Креативті индустрияны қолдау – Yandex Qazaqstan үшін негізгі басымдықтардың бірі. Біз технологиялық шешімдер шығармашылықты күшейтіп, авторларға өз аудиториясын табуға және мәдени жобаларды миллиондаған адамға қолжетімді етуге көмектесе алады деп сенеміз. Біз креаторлар үшін өсу мен өзін-өзі көрсету мүмкіндіктерін көбірек жасағымыз келеді», – деп қорытындылады Yandex Qazaqstan компаниясындағы GR жобалар жетекшісі Ерлан Игісінов.
