Солтүстік Қазақстан облысында қоғамдық қауіпсіздікті қамтамасыз ету бағытында жаңа технологияларды енгізу жұмыстары қарқынды жүргізілуде. Мемлекет басшысы өз сөздерінде құқық қорғау саласында заманауи цифрлық шешімдерді жедел енгізудің маңыздылығын ерекше атап өтеді. Бұл полиция жұмысының тиімділігі мен ашықтығын арттырумен қатар, құқықбұзушылықтар санын азайтып, азаматтардың тәртіп сақшыларына деген сенімін нығайтады, деп хабарлайды Social Media.
Осы бағыттағы маңызды қадамдардың бірі – Кызылжар ауданында Жедел басқару орталығының (ЖБО) ашылуы. Бұл – бейнебақылау камералары мен жол қозғалысын бақылау жүйелерін бір желіге біріктіретін заманауи кешен. Барлық нысандар талшықты-оптикалық байланыс арқылы қосылған, бұл деректердің тұрақты әрі жылдам жеткізілуін қамтамасыз етеді.
ЖБО-да тәулік бойы кезекшілік атқарылады. Камералар ауданның басты көшелері мен қоғамдық орындарын бақылап қана қоймай, көлік жүргізушілерінің жылдамдықты асыруы немесе басқа да жол ережелерін бұзуы сияқты жағдайларды автоматты түрде тіркейді. Қызметкерлер кез келген оқиғаға жедел әрекет етіп, патрульдік жасақтарды қажетті жерге бағыттай алады.
Жаңа орталықтың тиімділігі қазірдің өзінде байқалуда – құқықбұзушылықтардың ашылу деңгейі екі есе артқан. Бұрын ұзақ уақыт талап ететін істер енді бейнежазбалардың көмегімен аз уақыт ішінде ашылуда.
Тек қана қоғамдық тәртіп емес, экология мәселелері де назардан тыс қалмады. «Таза Қазақстан» республикалық акциясы аясында ЖБО мамандары бейнебақылау арқылы рұқсат етілмеген қоқыс орындарын анықтап, тиісті қызметтердің дер кезінде әрекет етуіне мүмкіндік беруде. Бұл ауданның экологиялық жағдайын жақсартуға елеулі үлес қосады.
Алдағы уақытта Солтүстік Қазақстан облысының барлық аудандарында осындай орталықтарды ашу жоспарланып отыр. Бұл – өңір тұрғындарының қауіпсіздігі мен жайлы өмір сүруіне бағытталған, заманауи технологияларға сүйенген бірыңғай бақылау жүйесін қалыптастыру жолындағы маңызды қадам.
Осылайша, «Заң мен тәртіп» қағидаты СҚО-да нақты іске асуда. Кызылжар ауданындағы ЖБО тәжірибесі жаңа технологиялардың тиімділігін дәлелдеп, қоғамдық қауіпсіздікті қамтамасыз етудің болашағы цифрлық шешімдермен тығыз байланысты екенін көрсетіп отыр.
