Кешке қарай петропавлдықтар үйлеріне оралып, батареялардан тараған жылылықты сезінген сәтте, қаланың басқа шетінде сол жылудың үздіксіз берілуін қамтамасыз етіп жүрген жандар бар. Солардың бірі – Марианна Станилевич, «СЕВКАЗЭНЕРГО» АҚ-ның «Жұмысшы кенті» №6 жылу пунктінің сорғы қондырғыларының машинисі, деп хабарлайды Social Media.
Марианна Станилевич 13 жылдан бері Петропавл қаласының мыңдаған тұрғынын жылумен қамтамасыз ету ісіне жауапты. Оның жұмыс күні – қатаң тәртіп, дәлдік пен зор жауапкершіліктен тұрады.
«Физикалық тұрғыдан кейде оңай емес, – дейді Марианна. – Бірақ өз еңбегіңнің арқасында адамдардың үйлері жылы екенін түсінгенде, күш-қуат өзінен өзі пайда болады.»
Күн сайын ол жабдықты тексеріп, журналдарды қарап шығады, қысымды бақылайды, сорғыларды қосып, тоқтатады. Бұл көзге көп көрінбейтін, бірақ қаланың жайлылығы мен тыныштығы үшін аса маңызды жұмыс.
«Қатты аяз күндері де батареялар жылы болуы тиіс. Бұл – біздің басты қағидамыз», – дейді ол.
Энергетика Марианна үшін жай ғана кәсіп емес – бұл өмірінің және отбасының ісі. Бұрын осы кәсіпорында оның енесі мен қайнысы да еңбек еткен. Ал өзінің еңбек жолын ол жабдықтау бөлімінде қоймашы болып бастаған екен.
«Мені желілік ауданға ауыстырғанда алғаш рет жылу жүйесінің қалай жұмыс істейтінін көрдім. Сол сәттен бастап осы істің бір бөлігі болғым келді. Сөйтіп машинист болдым», – дейді ол.
Кейін Марианна жоғары білім алып, жылу техникасы инженері дипломын иеленді. Ол өз ұстаздарын – Нина Визнер мен Алексей Хоменконы ерекше ілтипатпен еске алады:
«Олар маған жұмыста да, оқуда да көп көмектесті. Диплом алғанымда, өз баласындай қуанды.»
Қазір ол мамандық таңдап жүрген жастарға сеніммен айтады:
«Еңбектен қорықпаңыздар, жұмысшы мамандықтардан ұялмаңыздар. Бұл – абыройлы әрі маңызды іс. Біздің еңбек – бүкіл қаланың сезінетін жылуы.»
Жұмыстан тыс уақытта да Марианна өз білімін жетілдіруден жалықпайды: итальян, португал және поляк тілдерін үйреніп жүр, ағылшын және қазақ тілдерінде еркін сөйлейді.
«Жаңа нәрсені үйрену мені шабыттандырады. Тоқтап қалмай, үнемі дамып отыратын маман болғым келеді», – дейді ол.
Осындай мамандар – Марианна Станилевич сияқты адамдар – тек «СЕВКАЗЭНЕРГО» АҚ-ның ғана емес, бүкіл Солтүстік Қазақстан облысының мақтанышы. Дәл осындай еңбекқор жандардың арқасында жылу желілерінің тұрақтылығы мен сенімділігі сақталып, петропавлдықтардың үйлерінде жылылық пен жайлылық орнайды.
