Петропавл қаласындағы «Ботай» арт-галереясында Қазақстан Республикасы Суретшілер одағының Солтүстік Қазақстан облыстық филиалының дәстүрлі жыл сайынғы есептік көрмесі – «Шабыт» жобасының салтанатты ашылуы өтті, деп хабарлайды Social Media.
Бұл – желтоқсан айындағы маңызды мәдени оқиғалардың бірі. Көрме кәсіби суретшілер қауымын, өнерсүйер қауымды және қала қонақтарын бір алаңға жинап, жыл бойғы шығармашылық жұмыстың қорытындысын ұсынды.
Алғашқы минуттардан-ақ келушілер көрменің ерекше атмосферасын сезінді: фойедегі LED-экрандарда қатысушылардың фотосуреттері, бейнероликтер мен жұмыстардың аннотациялары көрсетілді. Музыкалық үзіліс салтанатты, шабыт сыйлайтын көңіл күй қалыптастырып, жаңа көркем әсерлерге жетеледі.
Биылғы жоба бес қылқалам шеберінің – Ғалия Әбенова, Анатолий Тюрин, Айдарбек Қалдыров, Игорь Василенко және Марат Қожахметовтың еңбектерін біріктірді. Әр суретші бір жыл ішінде жасалған авторлық сериясын ұсынды. Экспозицияда кескіндеме, графика, сәндік-қолданбалы өнер бұйымдары, аралас техникадағы жұмыстар және ерекше арт-объектілер қойылған.
Көрмеде табиғат тақырыбы, адамның ішкі жан дүниесі, өңірдің мәдени тамырлары және жаңа көркем формаларды іздеу түрліше бейнеленген. Бағыттары әртүрлі болғанымен, барлық туындыларды біріктіретін ортақ белгі – шығармашылыққа деген шынайы ұмтылыс.
Салтанатты бөлімде мәдениет саласының дамуына қосқан үлесі мен көпжылдық еңбегі үшін Алғыс хаттар табысталды. Марапаттарды облыстық музейлер бірлестігі директорының орынбасары Еркін Шалкенов тапсырды. Бұл сәт өңірлік көркемсурет мектебінің ұзақ жылдар бойғы табанды еңбек пен шабыттың нәтижесі екенін айқындай түсті.
Рәсімнен кейін сөз суретшілердің өздеріне берілді. Олар жыл бойы жүзеге асырған идеялары, жаңа жобалары және шығармашылыққа жетелеген шабыт көздері туралы ойларымен бөлісті.
Суретші-живописші, педагог, Қазақстан Суретшілер одағының мүшесі, республикалық, бұрынғы одақтық және халықаралық көрмелердің қатысушысы, «Өнер колледжі – Дарынды балаларға арналған мектеп» кешенінің оқытушысы Анатолий Михайлович Тюрин есептік көрменің маңызына тоқталды.
Оның айтуынша, Суретшілер одағының жыл сайынғы есептік көрмесі өңірдің шығармашылық өміріндегі маңызды оқиға болып қала береді. Биыл 15 желтоқсанда Алматы қаласында Республикалық Суретшілер одағының «Уақыттар жаңғырығы» атты көрмесі өтеді.
«Көрменің басты мақсаты – Қазақстандағы бейнелеу өнерінің даму қырларын көрсету, кәсіби өнердің қалыптасу кезеңдері мен маңызды тұлғаларын еске салу», – дейді ол. Сондай-ақ биыл атап өтілетін мерейтойлы даталарға тоқталды: Қазақстандағы кәсіби көркем білім беру мектебінің негізін қалаушы Николай Хлудовтың 175 жылдығы және Евгений Сидоркиннің 95 жылдығы. «Бұл – ел өнері тарихындағы аса маңызды есімдер», – деп атап өтті суретші.
Республикалық экспозиция қарсаңында облыс орталығында Солтүстік Қазақстан суретшілерінің есептік көрмесі ұйымдастырылды. «Әр суретші өз дүниетанымын, әлемге деген көзқарасын көрсетуге тырысады. Арамызда живописшілер де, графиктер де, сюжетке жұмыс істейтін шеберлер де бар», – дейді Анатолий Тюрин.
Өз туындылары туралы айта келе, ол екі пейзажын – «Күзгі саябақ» пен «Үлкен су» жұмыстарын таныстырды. «Бір картинамда күздің бояуға толы, табиғаттың қысты қарсы алар алдындағы тыныш кезеңін бейнеледім. Екіншісінде – көктемгі тасқын. Биылғы су тасқыны ауыр сынақ болды, бірақ мен трагедияны емес, қозғалысты, судың әкелетін қуатын және сұлулығын көрсетуге тырыстым», – деді автор.
Анатолий Михайлович ұзақ жылдар бойы өнер колледжінде сабақ беріп келеді. Оның айтуынша, түлектер Қазақстанда ғана емес, шетелде де сұранысқа ие. Көпшілігі жоғары оқу орындарында білімін жалғастырып, суретші, дизайнер, сәулетші және оқытушы мамандықтарын таңдауда. Жақында колледж студенттері де өздерінің кезекті есептік көрмесін өткізді.
Айдарбек Қалдыров – ұлттық тұрмыстық бұйымдар, сәндік паннолар мен түрлі көркем жұмыстардың авторы. Ол да көрме туралы ойымен бөлісіп, бүгінгі көркем орта жайында пікір білдірді.
«Бұл – біздің есептік көрмеміз. Біз көрерменге өз ойымызды, философиямызды жеткізуге тағы бір мүмкіндік алдық. Филиалда жеті суретші бар, бүгін бес суретшінің жұмысы ұсынылды. Көрме ешкімді бейжай қалдырмайды деп ойлаймын», – деді ол.
Жас суретшілер үшін бүгінгі мүмкіндіктерге тоқталған Айдарбек Қалдыров: «Қазіргі жастарға жол ашық. Материал да, ақпарат та жеткілікті. Ең бастысы – қорықпау, бірден шедевр жасауға ұмтылмау. Нағыз бағасын уақыт өте көрермен береді. Кейбір жұмыстар біртіндеп пісіп-жетіледі», – дейді.
Оның пікірінше, кәсіби өсу ішкі адалдықтан және өз көркем тілін табудан басталады. «Не өзің үшін, не көрермен үшін жасап отырғаныңды түсіну маңызды. Барлығы адамның өзіне байланысты», – деп түйіндеді ол.
«Шабыт» атауының өзі ішкі серпін мен идеяны көркем образға айналдыратын күшті білдіреді. Бұл қуат көрмедегі әрбір туындыдан анық сезіледі.
Экспозиция бойынша экскурсияларды Гаухар Дүйсембекова мен Айшабиби Хадесова жүргізеді. Олар қонақтарды авторлардың өмірбаянымен таныстырып, жұмыстардың ерекшеліктерін түсіндіріп, өңірдегі заманауи өнердің даму бағыты туралы мағлұмат береді.
Бүгінде «Шабыт» – жай ғана есептік көрме емес. Бұл – суретшілер мен көрермендер, жас авторлар мен сарапшылар тоғысатын, пікір алмасып, жаңа жобаларға шабыт алатын мәдени алаң. Қала тұрғындары үшін бұл өңір өнерінің дамуын көріп, шығармашылықтың тірі энергиясын сезінуге мүмкіндік береді.
